ELKAR SARIAK 2017

Eresbilek Ibilbideari elkar saria jasoko du bihar 1974tik
euskal musika bildu, landu, gorde eta euskal gizartearen esku jartzen
egindako lanagatik

elkar sarien sari emate ekitaldiko argazkiak
2017.04.27 - elkar sariak - sari emate ekitaldia

Bihar, apirilak 27 egingo da Martin Ugalde kultur parkean elkar sariak emateko ekitaldia. Duela egun batzuk jakinarazi genuen bezala, Jakinen “XX. eta XXI. mendeetako euskal pentsamenduaren transmisioa” egitasmoak jasoko du Proiektuari elkar saria.

Ekitaldi berean, bigarren sari bat ere emango da: Ibilbideari elkar saria. Sari hori Eresbil Musikaren Euskal Artxiboak jasoko du.

Eresbilek lan handia egin du urte luzez euskal musika bilatu eta jasotzen, gure ondare gisa gal ez dadin, eta garrantzi handiagoa duena, hurrengo belaunaldietara ere irits dadin. Musika ondarea ikertu, bildu, kontserbatu eta jakitera ematea du helburu, bereziki euskal konpositoreen lanak.

Eresbil Musikaren Euskal Artxiboak musika ekoizpenak kontserbatzen ditu, euskarri guztietan - testuak, ikus-entzunezkoak edo ikonografikoak-. 2000 urteaz geroztik, Euskal Autonomia Erkidegoko partituren eta soinuzko grabazioen Lege Gordailuko kopia bat gordetzen du.

Hasieratik gordetzen ditu pertsona zein instituzioen fondoak, 170etik gora gaur egun, horietan aipagarrienak euskal konpositoreen fondoak izanik.

Horrez gain, zenbait datuk ematen digu Eresbilen lana eta ekarpenaren tamaina:

  • Partitura eskuidatziak. (17.000)
  • Inprimatutako partiturak. (54.000)
  • Monografiak (17.000)
  • Aldizkariak (1.270 tit.)
  • Soinuzko grabazioak (101.000)
  • Ikus-entzunezko dokumentuak (1.900)
  • Programen bildumak (1.172)
  • Kartelen bildumak (1.254)
  • Argazkiak (10.700)
  • Dokumentazioa (15.500)

Urteetan egindako lan hori da elkar Fundazioak, saritu, aitortu eta eskertu nahi duena. Balio handia du euskal kultura bildu eta transmititzeko egiten den lan orok, eta Eresbil Musikaren Euskal Artxiboak euskal musikarekin egiten duenak ere halaxe du. 1974tik gaur arte etengabeko lanean aritzea, euskal musika gorde eta lantzea eta hori guztia euskal gizartearen esku jartzea garrantzi handikoa izan da, eta halaxe da gaur egun ere.

Lan hori dena egiteko, musikaren inguruko eragileekin elkarlanean ari da Eresbil, euskal musikan aktore diren musikari eta diskoetxeekin batera. Urteetako lan harremana du, adibidez, elkar-ekin urteak dira diskoetxeak argitaratutako diskoen kopiak haren esku uzten dituela. Eta horrela jarraituko du aurrerantzean ere, ekoizten duena Eresbilen esku utziz, kultur transmisioan ezinbesteko bidelaguna baita. Euskal kulturak, eta elkar-ek bereziki, eskertu behar dio Eresbili hainbat eta hainbat artxibo galdu berreskuratzea.

Egindako lan guztiagatik eta bide berari eutsiz, urte askotan lanean jarrai dezan erabaki du elkar Fundazioak 2017ko Ibilbideari elkar saria ematea Eresbil Musikaren Euskal Artxiboari.

elkar sariak emateko ekitaldia bihar ostegunez, Martin Ugalde kultur parkean, arratsaldeko 19:00etan egingo da.

HARREMANETARAKO

Eresbil: bulegoa@eresbil.com | 943 000 868

Joanmari Larrarte: jmlarrarte@elkar.eus | 635 707 039


Jakinek Proiektuari elkar saria jasoko du XX. eta XXI. mendeetako euskal pentsamenduaren transmisioa lanarekin

elkar Fundazioaren helburu nagusia euskal kultura sustatzea da.

Iaz aurreratu genuen bezala, sarien barruan bi sari eta beka bat ditugu. Ibilbideari elkar saria, Proiektuari elkar saria eta Joseba Jaka beka. Lehena urtero emango da eta beste biak, txandaka, bi urtetik behin.

Aurten, Proiektuari eta Ibilbideari saria emango ditugu. Bigarrena nork jasoko duen sari emate ekitaldian jakinaraziko dugu, gaurko aurkezpenean Proiektuari elkar saria jakitera eman dugu.

Beka emango ez den urteetan, kultur proiektuak laguntzeko asmoz sortu den saria da Proiektuari saria. Bi urtez behin emango da, beraz. Euskal kulturgintzarako interesgarria den ekimen bat abiatzeko edo indartzeko emango litzateke 10.000 euroko laguntza. Euskara eta euskal kultura ardatz izango dituen proiektu bat laguntzea da helburua; proiektu zehatza lagunduko da, baina puntuala ez izatea eta jarraipena izatea baloratuko da; lehendik martxan dagoena edota abiatu asmo dena izan daiteke; eta elkar Fundazioaren izaera eta baloreekin bat datorren proiektua lehenetsiko da. elkar Fundazioak berak erabakiko du, euskal kultur munduan ikusten dituen mugimenduen baitan, sari hori nork merezi duen.

Irizpide horiek kontuan hartuta, aurtengo saria Jakinek martxan jarri nahi duen proiektu bati ematea erabaki du elkar Fundazioak: XX. eta XXI. mendeetako euskal pentsamenduaren transmisioa. Hauek dira saria emateko arrazoiak:

  • Interes handiko proiektua dela ikusten dugu.
  • Baloratu dugu jarraipena duen egitasmoa dela, ez da ekimen bakarrean geratuko, jarraipena izango du aurrera begira. Lehen urratsa izango da Txillardegiren pentsamendua zabaltzea, baina proiektuaren asmoa beste batzuekin jarraipena izatea da.
  • Belaunaldien artean transmisio falta dago, euskal kulturan ere bai, eta euskal kultur pentsamenduari dagokionez, zer esanik ez. Transmisioa lantzen duen egitasmoa izatea baloratu dugu.
  • Euskal Herrian azken urteetan garrantzia handia izan duen pentsamendua bildu eta zabaltzeko aukera ematen du egitasmoak eta hori garrantzi handikoa da.
  • Gainera, ekimena hainbat eragilerekin elkarlanean garatuko du Jakinek, jende askoren parte hartzearekin, eta hori ere kontuan hartzekoa iruditu zaigu.

60ko hamarkadatik gaur egunera arte, Euskal Herriko pentsamendauren eta kulturaren garapenean berebiziko garrantzia duten hainbat euskal autorereren lana berreskuratzea, transmititzea eta dibulgatzea da proiektuaren helburua. Jose Luis Alvarez Enparantza Txillardegi izan da aukertutako lehenengo autorea, eta bere obra ezagutzera emateko sareko ataria, eta ikus-entzunezko eta liburu bilduma osatuko du Jakinek elkarren laguntzari esker.

Proiektuari eta Ibilbideari elkar sariaren emate ekitaldiak apirilaren 27an, arratsaldeko 19:00etan Martin Ugalde kultur parkean emango dira.

HARREMANETARAKO: Joanmari Larrarte

jmlarrarte@elkar.eus | 635 707039

 

elkar argitaletxea Ttarttalo Oihuka Sua argitaletxea Txertoa elkar banaketa elkar